काठमाडौं-ललितपुरस्थित ग्वार्को ओभरपासको निर्माण ३९ महिनापछि पूरा भई सकेको छ। निर्माण सम्पन्न भएसँगै पर्सि शुक्रबारदेखि ओभरपासमा सवारीसाधन आवागमन खुला गरिने तयारी भइरहेको छ।
कोटेश्वर–ग्वार्को–कलंकी सडकखण्डमा दैनिक ट्राफिक जाम बढेपछि यो ओभरपास विकल्पका रूपमा निर्माण गरिएको थियो। यस खण्डमा ट्राफिक प्रहरीले दैनिक ठूलो संख्यामा जाम खोल्न संघर्ष गर्नुपर्ने स्थिति थियो।
ट्राफिक वृत्त कोटेश्वरका प्रमुख सूर्यप्रसाद पौडेलका अनुसार ओभरपास सञ्चालनमा आएपछि बिहान र साँझको सवारी चापबाट हुने जाममा उल्लेखनीय कमी आउने अपेक्षा छ।
ओभरपासमार्गबाट ग्वार्कोबाट लुभु तर्फ जाने गाडीहरू मुनिबाटै वारपार गर्नेछन् भने कोटेश्वरबाट कलंकी तर्फ जाने सवारीले ओभरपास प्रयोग गर्नेछन्।
सडक विभागको गुणस्तर, अनुसन्धान तथा विकास केन्द्रका निर्देशक दीप बाराहीले शुक्रबारअघि रंगरोगन र ट्राफिक बत्ती जडानसमेत सकिने जानकारी दिएका छन्।
ओभरपास ग्वार्को चोकबाट कोटेश्वरतर्फ ३२० मिटर र सातदोबाटोतर्फ १८५ मिटर लामो रहेको छ र दुवैतर्फ चार तहको कालोपत्र गरिएको छ।
लेखकको बारेमा
प्रतिक्रिया